Hei eng kleng Auswiel vu Mountainbiketouren, déi een hei am Land ka fueren. Déi meescht Toure sinn aus eisen Archiven, verschiddener krute mer awer och vu lokale Kolleege bäigesteiert!

E ganz grousse Merci geet un de Pit SCHOLTES vu bididu, dee ganz vill gehollef Gpxdateien ze "kämmen*", Fotoen an Toure bäigesteiert an säi Geoportailwëssen afléisse geloss huet!

All eis Kaarte sinn op Geoportail, de Kaartesite vum lëtzebuerger Kadaster, ze fannen.

DISCLAIMER

MOUNTAINBIKE KA GEFÉIERLECH SINN! Dir begéint och aner Benotzer vun dëse Weeër. Adaptéiert är Vitesse a Verhalen den Ëmstänn no, a setzt weder är nach anere Leit hier Gesondheet op d’Spill! Biker.lu proposéiert iech hei Tier, iwwerhëlt awer keng Responsabilitéit iwwert eventuell Verletzungen oder Konflikter mat anere Leit.

*Gpx-Datei kämmen: eng Gpx-Datei aus dem GPS komplett op der Landkaart nozeechnen, fir dass keng Ofweichunge, Fehler, Pausen o.ä. méi dra sinn an de Benotzer herno eng propper Kaart virfënnt

BIKER.LU CCR021 Heffingen 28 Km /c.a. 500 Hm

Carousel imageCarousel imageCarousel image

Den Hiefenecher Tour, dee mir bei der Kierch starten, féiert eis no Norden bei d’Hiefenecher Antenne an no enger Schläif duerch de Fielser Bësch direkt an d’Supp.

Mir bleiwen ca 700 Meter op der neier Vëlospist fir dann direkt déi gëfteg Steigung op Waldhausen an Ugrëff ze huelen.

No ongeféier 10 km fuere mir duerch de Walddëstelpad ( grouss Usammlunge vun houx) a kommen dann op de Schiltzbierg bei d’Fierschterhaischen, wat mat Stréiballe gebaut gouf.

Mir passéieren am Guedberbësch d’Häertcheslee, dat eelste Steendenkmol vu Lëtzebuerg.

Nom Schwäibësch zu Guedber (schéine Weier) fuere mir lénks stramm biergop a Richtung Reiland a kommen da bei de Loschbur, wou 1935 deen eelste Lëtzebuerger fonnt gouf ( Skelett geschat op 8000 Joer)

http://g-o.lu/3/jWxg

BIKER.LU CCR022 (BERDORF)

Carousel imageCarousel imageCarousel imageCarousel imageCarousel image

Ee vun de Klassiker! De Mëllerdall mat all sëngen Highlights, wéi Jurassicparc, Halerbach, etc an zu gudder Läscht..de Réimerwee...en absolute Killeruphill, wou scho sou munch een ofgekackt ass.

De Mëllerdall ass emmer technesch, mat senge Schluchten, Trapen a Brecken... de Sandsteen meeschtens gut grëffëg an suguer no vill Reen ass den Terrain meschtens gut fuerbar!

Vill Spass beim Nofueren- a wéi gewinnt ass Feedback erwënscht!

http://g-o.lu/3/y3IS

BIKER.LU CCR023 (Kautebach) 23 Km / 800 Hm

Carousel imageCarousel imageCarousel imageCarousel image

De Jón Gales huet eis dësen Tour bäigesteiert!

Kautebach ass immens flott aus der Staat mam Zuch ze errechen!

Muss ech do vill soen? 23 Km 800 Hm...sidd do virsichteg iert der behapt, den Tour an enger Stënnche gemach ze hunn..

Et ass beileiwe keen Ufängertour, a vill Leit no denen 23 Km d'Box gut voll hun...oder bluddeg Knéien, well opgepasst, iwerall lauert messerscharfe Schieffer.

http://g-o.lu/3/3zaz

Vill Spass beim nofueren a Feedback wéi emmer erwënscht

BIKER.LU CCR024 (Mëllerdall)

Carousel imageCarousel imageCarousel image

Dësen Tour huet den Tom Poull eis opgezeechent!

Et ass en usprochsvollen Tour vu 32km am Mëllerdall mat vill Trailundeel a spassegen an techeschen Deeler bierop a biergof. E geet vum Mëllerdall (Parking bei der Heringermillen) op d’Vugelsmillen, ronderëm Befort an duerch d’Haupesch- an Halerbaach nees zeréck op dVugelsmillen. Vun do aus geet et nach emol technesch a stramm op Berdref vis-à-vis vum Priedegstull an dann floweg, spasseg an technesch neess zeréck an de Mëllerdall.

Et ass keen Tour fir Ufänger!!! http://g-o.lu/3/rgPO

BIKER.LU CCR 025 CITYJUNGLE 1 20 Km / 500 Hm

Carousel imageCarousel imageCarousel imageCarousel imageCarousel imageCarousel imageCarousel imageCarousel imageCarousel imageCarousel imageCarousel imageCarousel imageCarousel imageCarousel imageCarousel imageCarousel image

Un där hei hun ech laang geheekelt...an ech si secher, dass se net jidderengem gefällt..déi eng wärten se ze ruppeg fannen, déi aner ze geféierlech..anerer bekloen sech iwwer zevill Trapen...

Kuckt iech d'Fotoen un, séi soe scho vill aus! Et ass eben eng Tour matten duerch d'Häerz vun eiser Haaptstaat, a gleewt mer, déi gëtt sou munches hier.

Waart op e schéine Summerdaag a fuert déi Tour oof, a soot mer waat der dovun halt.

AWER OPGEPASST: och wa se nemmen 20 km a 500 Hm huet, et ass keng Ufängertour-se ass secher schwéier, platzeweis och geféierlech. Hei sin Trapen an Trapen an Trapen a Serpentinen a ruppeg Wuerzelpassagen an Trapen a Pawée an Trapen a Singletrail an Trapen dran..a virun allem: Trapen, an e puer Highlights aus eiser flotter City..ah jo, an Trapen.

http://g-o.lu/3/hifC

Nofueren erwënscht (bleiwt ganz) a Feedback erwënscht.

Méi Touren deemnächst...